Dening: Yenny Listyana Idhawati

Bebedan jarik kambil sacukil

Petruk njoged kethuwal-kethuwil

bungahe dikatonake

mikat kowe sing anteng nyawang hape

Suwe banget jogedane

nganti kemringet awake

nganti meles jarike

nganti suda bungahe

malih pringisan raine

kowe tetep jenak nyawang hape

ora kepikat, ora kepikut

ora kober nguwongake

Petruk salin jarik kawung

gandhang swarane manggung

nembangake tembung-tembung

ngelingake kowe sing methentheng dolanan hape

Pirang-pirang pada cakepan dirampungake

nganti megap-megap ambegane

nganti kendho sabuke

nganti ilang bungahe

malih mencereng mripate

kowe tetep tumungkul menthelengi hape

ora krasa, ora rumangsa

ora gelem nggatekake

Petruk salin krubutan sarung

ndheprok nyekukruk bingung

ngelu sirahe nggregesi awake

kebanteren mikire

piye carane nyapih kowe saka hape